Kur flasim për plakjen, zakonisht mendojmë menjëherë për lëkurën, rrudhat ose ndryshimet e trupit. Megjithatë, edhe flokët ndikohen nga kalimi i viteve dhe me kohën fillojnë të tregojnë shenja të dukshme të plakjes. Flokët humbasin shkëlqimin, bëhen më të hollë, më të brishtë dhe më të vështirë për t’u stiluar. Produktet apo rutina që dikur funksiononin perfekt, papritur nuk japin më të njëjtin rezultat.
Ky është një proces krejtësisht natyral dhe nuk duhet parë si diçka negative apo shqetësuese. Të kuptosh se çfarë ndodh me flokët me kalimin e kohës ndihmon për t’u kujdesur më mirë për ta dhe për t’i mbajtur të shëndetshëm, të fortë dhe të bukur sa më gjatë.
Ekspertët shpjegojnë se plakja e flokëve lidhet ngushtë me shëndetin e skalpit dhe të folikulave të flokëve, pra strukturat nga të cilat rritet floku. Me kalimin e viteve, folikulat marrin më pak oksigjen dhe ushqyes të nevojshëm, duke prodhuar flokë më të dobët dhe më pak vitalë.
Hollimi i flokëve dhe humbja e volumit
Një nga shenjat e para të plakjes së flokëve është hollimi i tyre. Flokët duken më të imët, më të dobët dhe humbasin dendësinë. Shumë persona vënë re se flokët nuk kanë më të njëjtin volum si më parë dhe mbajtja e flokëve të gjatë bëhet më e vështirë.
Kjo ndodh kryesisht për shkak të uljes së mikrocirkulimit të gjakut në skalp. Folikulat marrin më pak ushqim dhe prodhojnë flokë më të hollë. Gjithashtu, rritja e stresit oksidativ dhe e radikaleve të lira përshpejton plakjen qelizore dhe dëmton rrënjën e flokut.
Për të ngadalësuar këtë proces, është e rëndësishme të përdoren trajtime ushqyese dhe antioksiduese, si edhe të ndiqet një stil jetese i shëndetshëm. Ushqimi i pasur me vitamina, gjumi i mirë dhe ulja e stresit ndikojnë pozitivisht në shëndetin e flokëve.
Shfaqja e flokëve të bardhë
Thinjat janë ndoshta shenja më e dukshme e plakjes së flokëve. Megjithatë, flokët e bardhë nuk lidhen gjithmonë vetëm me moshën. Në shumë raste ato mund të shfaqen herët për shkak të gjenetikës, stresit ose mungesës së vitaminave dhe mineraleve.
Humbja e ngjyrës ndodh sepse organizmi prodhon më pak melaninë, pigmenti që i jep flokëve ngjyrën natyrale. Me kalimin e viteve, në folikulat e flokëve grumbullohet edhe peroksid hidrogjeni, një substancë që pengon prodhimin e melaninës.
Disa studime kanë treguar rëndësinë e enzimës katalazë, e cila ndihmon në neutralizimin e këtij procesi oksidativ. Por me kalimin e moshës, prodhimi natyral i katalazës bie, duke favorizuar shfaqjen e thinjave.
Sot, shumë njerëz zgjedhin t’i mbajnë thinjat natyrale dhe t’i kthejnë ato në një element elegance dhe stili. Nga ana tjetër, trajtimet moderne kozmetike dhe suplementet mund të ndihmojnë në ngadalësimin e këtij procesi.
Skalpi bëhet më i ndjeshëm
Me kalimin e kohës ndryshon edhe mikrobioma e skalpit, pra balanca e mikroorganizmave që mbrojnë lëkurën dhe ruajnë shëndetin e saj. Kur kjo ekuilibër prishet, mund të shfaqen irritime, tharje, yndyrë e tepërt dhe ndjeshmëri më e madhe.
Edhe faktorët e jashtëm si rrezet UV, ndotja, pluhuri dhe përdorimi i shampove agresive ndikojnë negativisht në shëndetin e skalpit, duke krijuar një ambient më pak të favorshëm për rritjen e flokëve të fortë dhe të shëndetshëm.
Për këtë arsye rekomandohet përdorimi i shampove delikate, pa përbërës agresivë si SLS dhe SLES, të cilët mund të dëmtojnë barrierën mbrojtëse të lëkurës.
Përbërës si rozmarina, e njohur për stimulimin e qarkullimit të gjakut, apo ekstraktet e pasura me vitaminë C dhe antioksidantë, mund të ndihmojnë në mbajtjen e skalpit të shëndetshëm dhe të oksigjenuar.
Si të parandaloni plakjen e flokëve
Ashtu si kujdesemi për lëkurën për të ngadalësuar shenjat e plakjes, edhe flokët kanë nevojë për kujdes specifik. Parandalimi fillon nga rutina e përditshme.
Është e rëndësishme të përdoren produkte të buta dhe ushqyese, të shmangen trajtimet kimike agresive dhe përdorimi i shpeshtë i piastrës apo tharëses në temperatura shumë të larta.
Edhe mënyra e jetesës luan një rol të rëndësishëm. Ushqimi i balancuar, aktiviteti fizik, hidratimi dhe menaxhimi i stresit ndikojnë drejtpërdrejt në mirëqenien e organizmit dhe, rrjedhimisht, edhe në shëndetin e flokëve.
Çdo ndryshim që ndodh te flokët është një mënyrë përmes së cilës trupi ynë komunikon me ne. Të pranosh evolucionin natyral të flokëve nuk do të thotë të heqësh dorë nga kujdesi për ta, por të mësosh të kuptosh dhe të respektosh nevojat e tyre të reja me më shumë vetëdije.
— THELB,
