Gati tridhjetë vjet pas zhdukjes së tyre tragjike, John F. Kennedy Jr. dhe Carolyn Bessette Kennedy vijojnë të zënë një vend të veçantë në kujtesën kolektive — aq sa sot janë në qendër të kapitullit të parë të Love Story, seria e re antologjike e firmosur nga producenti televiziv Ryan Murphy. Në kulmin e famës, John Fitzgerald Kennedy Jr. dhe PR e modës Carolyn Bessette mishëronin përrallën moderne amerikane. Bessette, në shumë aspekte, shihej si Jackie Kennedy e re, ndërsa ‘John John’ dukej i destinuar të bëhej JFK i ardhshëm.
Seria pasqyron punën e Carolyn Bessette Kennedy për Calvin Klein, pasionet e saj, talentin e lindur për modën dhe spontanitetin me të cilin arriti të depërtonte në zemrën e njërit prej beqarëve më të famshëm të Amerikës. Në të njëjtën kohë, trajton peshën e mbiemrit të tij, familjen, presionin e mediave dhe tensionet e një martese që, sipas disa rrëfimeve, jo aq të qetë sa dukej — deri te fundi i tyre tragjik.
Seria, e cila doli në transmetim në prag të Shën Valentinit në Disney+, ka si protagonistë aktorët Sarah Pidgeon dhe Paul Kelly në rolet e Carolyn dhe John. Historia e tyre ka qenë një romancë në qendër të tabloideve, por sa nga ajo që rrëfehet përmes serialit përputhet me realitetin?
1992–1994: Takimi që ndryshoi gjithçka
John (32 vjeç) dhe Carolyn (26 vjeçe) u takuan për herë të parë në pranverën e vitit 1992, në selinë qendrore të Calvin Klein në New York, ku ajo punonte si përgjegjëse për marrëdhëniet me publikun. JFK Jr. i kërkoi numrin e telefonit dhe më pas e ftoi t’i bashkohej grupit të tij të miqve në një darkë gala.
Pas një faze fillestare të shënuar nga këmbëngulja e tij, ai arriti të fitonte vëmendjen e Carolyn dhe kështu nisi marrëdhënia mes tyre. Sipas asaj që miku i tij i hershëm, Gustavo Paredes, i ka rrëfyer revistës People, ajo nuk ishte shumë e bindur se ai ishte vërtet serioz, ndërsa trashëgimtari i familjes Kennedy e kishte të vështirë të pranonte refuzimin — një përvojë krejtësisht e re për të.
Një rikthim i përkohshëm te Daryl Hannah
Fillimi i historisë mes Kennedy dhe Bessette nuk ishte aspak linear. Në një moment, marrëdhënia pësoi një ndalesë dhe John u kthye te ish-e dashura e tij historike, aktorja Daryl Hannah. Ata njiheshin që nga adoleshenca dhe ishin frekuentuar për disa vite.
Por rikthimi zgjati pak. Ai i kërkoi Carolyn të dilte sërish me të, duke i shpjeguar se lidhja me Hannah kishte përfunduar. Pak më vonë, një foto e publikuar nga New York Daily News ku John dhe Daryl shfaqeshin dorë për dore në një premierë filmi e tronditi Carolyn, e cila ndërpreu çdo kontakt.
John reagoi me lule të dërguara në zyrën e saj dhe telefonata të panumërta pa përgjigje. Deri në mëngjesin kur ndërroi jetë Jackie Kennedy. Carolyn, pasi pa lajmin, e telefonoi. Ishte momenti që i ribashkoi përfundimisht.
Grindja në Central Park
Para se të bëhej pjesë e një familjeje që Amerika e shihte si simbol, Carolyn kishte ndërtuar një jetë tërësisht private në Manhattan. Ajo e përjetonte me vështirësi faktin që mediat i kthenin detajet e jetës së saj personale në ushqim për tabloidet. Carolyn nuk dha kurrë intervista për marrëdhënien, nuk kërkoi vëmendje dhe as nuk tentoi të justifikohej publikisht.
Më 25 shkurt 1996, një debat i ashpër mes tyre në Central Park u fotografua dhe përfundoi në tetë faqe të New York Daily News. Ishte një nga momentet që tregoi se edhe intimiteti i tyre ishte bërë pronë publike.
1995–1996: Propozimi dhe dasma sekrete
Propozimi erdhi gjatë një daljeje me varkë në Martha’s Vineyard. Megjithëse për amerikanët ai ishte një lloj princi, Carolyn mori tre javë kohë për të thënë ‘po’. Fejesa u mbajt sekret për gjashtë muaj.
Më 21 shtator 1996, çifti u martua në një ceremoni intime në First African Baptist Church, me vetëm 40 të ftuar, mes tyre motra e John, Caroline Kennedy, si dëshmitare. Pak fotografi qarkulluan, por imazhi i Carolyn me fustanin e saj të dizenjuar nga Narciso Rodriguez mbetet një nga imazhet më ikonike të modës: minimal, i pangarkuar, i paharrueshëm. — një burim i vazhdueshëm frymëzimi edhe për nuset e sotme.
1996–1999: Presioni, krizat dhe zërat
Kennedy dhe Bessette shpresonin se, pasi të martoheshin, vëmendja e mediave do të zbehej më në fund. Në të vërtetë, presioni i shtypit u rrit. Për të mbrojtur marrëdhënien, Carolyn vendosi të linte punën dhe të bëhej ‘e padukshme’ në sytë e gazetarëve, por kjo nuk funksionoi.
Gazetat vazhdonin t’i kushtonin kopertina dhe çdo gjë që bënin ishte gjithmonë nën vëmendjen e publikut. Mediat, në më shumë se një rast gjatë marrëdhënies së tyre, u bënë një element shqetësues dhe pothuajse përçarës për çiftin.
Historia e dashurisë mes Kennedy dhe Bessette u shënua që në fillim nga zëra mediatikë për tradhti të mundshme nga të dy palët. Në muajt e fundit para zhdukjes së tyre tragjike, John dhe Carolyn u përpoqën të forconin marrëdhënien duke marrë pjesë në seanca terapie.
Në muajt e fundit para aksidentit, martesa e John dhe Carolyn po kalonte një periudhë të vështirë. Sipas burimeve të afërta, raportuar në mediat e kohës, një nga shkaqet kryesore të tensionit ishte çështja e fëmijëve.
Dëshmi të mbledhura në biografitë e tyre tregojnë se ata përballeshin me një kombinim presionesh personale, familjare dhe profesionale. Anthony Radziwill, kushëriri i John dhe mik i të dyve, ishte i sëmurë rëndë; revista e tij ‘George’ po përjetonte vështirësi financiare; dhe John mendonte seriozisht për një të ardhme në politikë. Tensionet nuk mungonin, por nuk përktheheshin në një vendim për ndarje.
Në të njëjtën kohë, ata po kërkonin një shtëpi jashtë qytetit, me idenë për të ndërtuar një familje dhe për të gjetur një hapësirë më të qetë larg Manhattan. Ditët e fundit përpara tragjedisë ishin të trazuara, por ata mbetën bashkë, duke u përpjekur ta mbanin martesën funksionale pavarësisht presionit të vazhdueshëm të jetës publike.
16 korrik 1999: Aksidenti tragjik
John (39 vjeç) pilotonte avionin me të cilin po udhëtonin Carolyn (33 vjeçe) dhe motra e saj Lauren (34 vjeçe), drejt dasmës së kushërirës së tij, Rory Kennedy. Tragjikisht, ata nuk arritën kurrë në destinacion. Avioni u rrëzua në Oqeanin Atlantik, pranë brigjeve të Martha’s Vineyard, Massachusetts.
Ekspertët besojnë se aksidenti u shkaktua nga humbja e orientimit të John ndërsa fluturonte natën mbi det, gjë që e bëri të humbiste kontrollin e avionit gjatë zbritjes. Trupat u gjetën më 21 korrik dhe autopsitë konfirmuan se të tre kishin vdekur në vend.
Dashuria e tyre mbeti pezull mes modelit të tyre të elegancës, presionit dhe fatit. Një histori që nisi si një përrallë urbane e viteve ’90 dhe përfundoi si një nga tragjeditë më të përfolura të Amerikës moderne — duke i shndërruar John dhe Carolyn në figura që koha nuk arriti t’i zbehë.
— THELB
