Ermonela Jaho është nderuar në Francë me titullin ‘Chevalier des Arts et des Lettres’, një nga dekoratat më prestigjioze që jep Ministria Franceze e Kulturës për figura me kontribut të rëndësishëm në art dhe kulturë.
Sopranoja shqiptare ndau vetë momentin e ceremonisë përmes një postimi emocional, ku e përshkroi marrjen e titullit si ‘një emocion të jashtëzakonshëm dhe një nder shumë të çmuar’, duke folur edhe për lidhjen e saj të veçantë me Francën dhe dashurinë për artin, kulturën dhe ‘të vërtetën njerëzore’.
‘Nuk mund ta imagjinoja një ambient më të bukur për këtë ceremoni sesa i rrethuar nga miq të sinqertë, dashamirës të artit dhe një publik që i dha kuptim të gjitha sakrificave të jetës së një artisti’, shkruan Jaho në mesazhin e saj, ku falënderon gjithashtu agjentin e saj afatgjatë Dominique Riber dhe Jean-Philippe Thiellay për mbështetjen dhe përkushtimin ndaj operës.
Edhe pse emri i saj ishte përmendur më herët në mediat franceze në lidhje me këtë nderim, ceremonia zyrtare e dorëzimit të titullit duket se është zhvilluar vetëm tani në Paris, moment që sopranoja shqiptare zgjodhi ta ndajë publikisht edhe me ndjekësit e saj.
Titulli ‘Chevalier des Arts et des Lettres’ konsiderohet një nga vlerësimet më të rëndësishme kulturore në Francë dhe u është dhënë ndër vite figurave të njohura ndërkombëtare të artit, muzikës, kinemasë dhe letërsisë si David Bowie, Meryl Streep, George Clooney, Tim Burton apo Shah Rukh Khan, duke e kthyer atë në një nga nderimet më simbolike që kultura franceze rezervon për figurat me ndikim në art dhe krijimtari.
Për publikun e operës ndërkombëtare, Ermonela Jaho prej vitesh konsiderohet një nga sopranot më të vlerësuara të brezit të saj, veçanërisht për intensitetin emocional dhe interpretimet dramatike në skena si Royal Opera House, Metropolitan Opera dhe Teatro alla Scala.
Kjo dekoratë franceze e vendos edhe më qartë figurën e saj përtej suksesit individual në skenë dhe jo vetëm si një artiste shqiptare me karrierë ndërkombëtare, por si një zë që prej vitesh është bërë pjesë organike e vetë kulturës operistike europiane.
Për publikun shqiptar, emri i Ermonela Jahos shpesh lidhet me krenarinë e një suksesi ndërkombëtar. Por në skenat më të mëdha të operës europiane, ajo prej vitesh lexohet si një nga zërat më emocionalë dhe më të vlerësuar të brezit të saj.
Pikërisht për këtë arsye, momenti i saj në Paris duket më shumë sesa një ceremoni dekorimi. Ai ngjan si konfirmimi simbolik i një rrugëtimi artistik që prej kohësh ka kaluar kufijtë e origjinës dhe është bërë pjesë e vetë kulturës operistike europiane.
— THELB,
