Google po rikthehet zyrtarisht në tregun e syzeve inteligjente, më shumë se një dekadë pasi dështoi me projektin Google Glass. Këtë herë, kompania po tenton të sfidojë drejtpërdrejt Meta, e cila ka krijuar një avantazh të fortë në treg falë syzeve inteligjente Ray-Ban Meta.
Në konferencën vjetore Google I/O, të zhvilluar pranë selisë së kompanisë në Mountain View, Kaliforni, Google prezantoi një linjë të re ‘syzesh audio’ të pajisura me mikrofon, kamerë dhe altoparlantë të integruar. Syzet do të funksionojnë me asistentin e inteligjencës artificiale Gemini dhe do t’u lejojnë përdoruesve të bëjnë telefonata, të dëgjojnë muzikë, të realizojnë fotografi dhe të ndërveprojnë me IA pa pasur nevojë të përdorin telefonin.
Ndryshe nga përpjekja e parë me Google Glass në vitin 2013, kompania këtë herë duket se po vendos theks të madh te dizajni dhe moda. Për këtë arsye, Google ka bashkëpunuar me markën amerikane Warby Parker dhe stilistin koreano-jugor Gentle Monster për dy koleksionet e para të syzeve inteligjente. Zhvillimi teknik është realizuar në partneritet me Samsung.
Mediat ndërkombëtare e kanë interpretuar këtë lëvizje si një përpjekje të Google për të mos mbetur pas në tregun e pajisjeve të reja të fuqizuara nga inteligjenca artificiale. Sipas raportimeve, syzet do të jenë të pajtueshme si me Android ashtu edhe me iPhone, një strategji që synon t’i bëjë ato më të aksesueshme për përdoruesit.
Ekspertët e teknologjisë vërejnë se Google po ndjek një model të ngjashëm me atë të Meta-s: syze të lehta, të orientuara te audio dhe asistenca me IA, në vend të pajisjeve të rënda me ekran të plotë të realitetit të shtuar.
Megjithatë, rikthimi i Google në këtë treg shoqërohet edhe me pikëpyetje për privatësinë. Google Glass u përball me kritika të forta vite më parë për shkak të kamerës së integruar dhe shqetësimeve mbi mbikëqyrjen. Tani, me zhvillimin shumë më të avancuar të inteligjencës artificiale dhe kamerave të veshshme, debati pritet të rikthehet edhe më i fortë.
Google konfirmoi gjithashtu se po punon paralelisht edhe për një version më të avancuar me ekran të integruar në lente, i ngjashëm me modelet XR që po zhvillohen aktualisht nga Meta. Kompania nuk ka zbuluar ende çmimin apo datën e saktë të lançimit, por syzet pritet të dalin në treg gjatë vjeshtës së vitit 2026.
— THELB,
