Me dy veshje krejt të ndryshme, modelja solli në pasarelë historinë, mjeshtërinë dhe mënyrën si moda i rikthen ato në të tashmen.
Gigi Hadid hapi Vogue World Milano 2026 në Galleria Vittorio Emanuele II me një fustan Valentino Haute Couture që dukej sikur vinte nga një përrallë. Pak më vonë, ajo u shfaq me një krijim të bardhë Gucci, një fustan i gjatë dhe të ngushtë pas trupit. Kalimi nga njëra veshje te tjetra tregonte edhe dy anë të modës italiane, fantazinë e punuar me dorë dhe elegancën që mbështetet te prerja dhe material.
Vogue World u mbajt më 22 shtator, në hapje të Javës së Modës në Milano. Tema e këtij edicioni ishte mjeshtëria dhe prekja njerëzore në epokën e teknologjisë. Në qendër të shfaqjes ishte puna që shpesh mbetet e padukshme kur shohim një veshje të përfunduar, zgjedhja e copës, ndërtimi i formës, qëndisja dhe orët e kaluara në atelie.
Një Alice sipas Alessandro Michele
Fustani me të cilin Hadid hapi shfaqjen vjen nga koleksioni Valentino Haute Couture pranverë–verë 2025, koleksioni i parë i modës së lartë që Alessandro Michele krijoi për shtëpinë. Mëngët e fryra, fundi i gjerë dhe jaka prej organze sjellin ndër mend veshjet e një kohe tjetër. Ka diçka prej botës së Alice në Botën e Çudirave në pamjen e tij, por hollësia më interesante gjendet te mënyra si është realizuar.
Për fustanin janë përdorur jorganë venecianë të ricikluar, të bashkuar në një kompozim copash mbi bazë ngjyrë fildishi. Realizimi kërkoi 1,680 orë punë me dorë. Materialet që kishin tashmë një jetë të mëparshme u kthyen në një veshje të modës së lartë. Kjo e bën fustanin më shumë se një figurë përrallore në pasarelë ku nga afër mund të lexosh punën dhe historinë e copave që e përbëjnë.
Gucci dhe një tjetër ide e së bardhës
Veshja e dytë ishte një fustan Gucci i krijuar posaçërisht për Hadid, i frymëzuar nga një model i periudhës së Tom Ford te shtëpia italiane. Ai ndiqte trupin nga supet te beli e ijët, përpara se të zbriste drejt këmbëve.Sipërfaqja e fustanit ishte punuar me temina të bardha mbi makramé, një teknikë thurjeje që krijon motive përmes nyjeve dhe ndërthurjes së fijeve. Teminat mund të lëviznin mbi material, duke i dhënë veshjes një shkëlqim natyral, thuajse si të lagur.
Dy fustanet përdornin të njëjtën ngjyrë në mënyra shumë të ndryshme. Te Valentino, e bardha ishte sfondi i një ndërtimi të pasur me copa, volume dhe referenca. Te Gucci, ajo nxirrte në pah vijën e trupit dhe sipërfaqen që ndryshonte në lëvizje. Pikërisht këtu dy paraqitjet e Gigi Hadid lidhen me temën e mbrëmjes: pas imazhit që shohim në pasarelë qëndrojnë duart, koha dhe njohuritë që e kanë bërë të mundur.
-THELB,
