Pesë stilistë, pesë koleksione dhe interpretime të ndryshme të modës. Më 28 shtator, Palazzo Giureconsulti, pranë Piazza Duomo, mirëpriti GX Fashion Week, një aktivitet që solli në Milano krijues nga vende dhe tradita të ndryshme. Mes tyre, stilisti shqiptar Xheksil Muça me markën PLISI dhe marka italiane Pin-Up Stars. THELB ndoqi nga afër prezantimet.
Milano ka një marrëdhënie të veçantë me modën e cila është pjesë e historisë së qytetit, e ekonomisë dhe e identitetit të tij kulturor. Gjatë Javës së Modës, kjo marrëdhënie bëhet edhe më e dukshme dhe intensive ku stilistë, modele, fotografë, gazetarë dhe profesionistë të industrisë mbushin rrugët, ndërsa koleksionet prezantohen në pallate historike, hapësira bashkëkohore dhe vende që për disa orë shndërrohen në pasarela.
Më 28 shtator, një prej këtyre hapësirave ishte Palazzo Giureconsulti, ndërtesa historike pranë Piazza Duomo, ku u zhvillua GX Fashion Week 2026. Jashtë, qyteti vazhdonte ritmin e zakonshëm. Turistë, kalimtarë dhe njerëz që ndalonin për të parë çfarë po ndodhte përpara pallatit. Brenda, gjithçka ishte përqendruar te koleksionet dhe përgatitjet për sfilatën.
Në pasarelë u prezantuan pesë krijues me përvoja dhe identitete të ndryshme: Xheksil Muça me PLISI, Michele Umberto Perrera me Sartoria Perrera, Nina Tsiklauri me Unique Milano, Owana Lima me Nicteel dhe Pin-Up Stars, nën drejtimin kreativ të Jerry Tommolinit.
Nga folklori shqiptar te tradita sartoriale italiane, nga eleganca bashkëkohore te eksperimentimi me materialet, secili koleksion solli një këndvështrim të vetin.
Gentiana Dervishi dhe projekti GX Fashion Week
Në krye të organizimit qëndron Gentiana Dervishi, themeluese e markës GX dhe organizatore e GX Fashion Week. Përmes aktiviteteve të zhvilluara në Milano dhe Paris, ajo ka krijuar një hapësirë prezantimi për stilistë nga vende të ndryshme, duke bashkuar në të njëjtën pasarelë krijues me përvoja dhe identitete të ndryshme. Në këtë veprimtari përfshihet edhe Albanian International Fashion Federation (AIFF), organizata që qëndron pas Albania Fashion Week dhe që mbështet pjesëmarrjen e stilistëve shqiptarë në prezantimet ndërkombëtare të GX Fashion Week.
Në edicionin e Milanos, kjo pjesëmarrje u përfaqësua nga stilisti shqiptar Xheksil Muça me markën PLISI, krahas krijuesve të tjerë ndërkombëtarë. Përzgjedhja e koleksioneve solli së bashku mjeshtërinë sartoriale të zhvilluar gjatë dekadave dhe kërkimet estetike të një brezi të ri stilistësh.
Xheksil Muça, legjenda shqiptare në pasarelën e Milanos
Sfilatën e hapi Xheksil Muça, stilisti shqiptar dhe themeluesi i markës PLISI, me koleksionin The Legend of Muji and the Fairies. I frymëzuar nga legjenda e Mujit dhe Zanave, koleksioni solli një interpretim bashkëkohor të elementeve të folklorit shqiptar.
E bardha mbizotëronte në krijime, ndërsa tyli i punuar dhe i lidhur me dorë formonte shtresa, transparenca dhe silueta të lehta. Brirët e dhisë, të përdorur si kurora, i jepnin koleksionit një karakter ceremonial dhe krijonin referenca ndaj figurave mitologjike. Plisi, një prej simboleve më të njohura të identitetit shqiptar, shfaqej si pjesë e kërkimit krijues të stilistit. Në punën e Muçës, elementet tradicionale marrin forma të reja, duke ruajtur lidhjen me origjinën e tyre.
Prezantimi në Milano ishte një tjetër hap për stilistin e ri shqiptar, i cili po zhvillon identitetin e markës së tij përmes referencave kulturore dhe punimeve artizanale.
Michele Umberto Perrera, mbi gjashtë dekada mjeshtëri sartoriale
Me Michele Umberto Perrera, pasarela solli një tjetër histori të modës italiane. Themelues i Sartoria Perrera, e krijuar në vitin 1959, ai ka ndërtuar një karrierë mbi mjeshtërinë e rrobaqepësisë tradicionale. Në moshën 88-vjeçare, Perrera vazhdon të krijojë dhe të prezantojë koleksione, duke ruajtur një marrëdhënie aktive me profesionin.
Prania e tij në GX Fashion Week ishte një kujtesë e rëndësisë së punës artizanale në modë. Pas një veshjeje qëndrojnë teknika, njohuri dhe përvojë, të cilat zhvillohen dhe përsosen gjatë viteve. Në një industri ku tendencat ndryshojnë vazhdimisht, mjeshtëria sartoriale mbetet një prej vlerave më të qëndrueshme të modës italiane.
Nina Tsiklauri, eleganca si shprehje e karakterit
Me origjinë nga Gjeorgjia dhe e lidhur me traditën sartoriale italiane, Nina Tsiklauri, themeluese e Unique Milano, prezantoi një koleksion ku vëmendja ishte përqendruar te silueta, prerjet dhe eleganca femërore. Krijimet e saj karakterizohen nga një estetikë e përmbajtur, ku linjat e strukturuara bashkëjetojnë me elemente më sensuale. Gruaja që propozon Tsiklauri është e vetëdijshme për stilin e saj dhe e përdor veshjen për të shprehur personalitetin. Koleksioni solli një interpretim të elegancës bashkëkohore, ku rëndësi kanë proporcioni, ndërtimi i veshjes dhe marrëdhënia e saj me trupin.
Owana Lima dhe Nicteel, kur materiali merr formë skulpturore
Një tjetër qasje estetike erdhi nga Owana Lima, stiliste me origjinë nga Guatemala, me markën Nicteel. Koleksioni Eternally the Light, pjesë e projektit Solsticio, u frymëzua nga marrëdhënia mes dritës dhe errësirës, qëndrueshmërisë dhe transformimit. Në qendër të krijimeve ishte përdorimi i leshit organik, i punuar për të krijuar sipërfaqe, volume dhe struktura të veçanta. Materiali merrte forma skulpturore, ndërsa drita dhe lëvizja ndryshonin mënyrën si perceptoheshin veshjet. Në këtë koleksion, eksperimentimi me teksturën dhe ndërtimin e formës ishte elementi kryesor i identitetit krijues.
Pin-Up Stars: Një tjetër interpretim i beachwear-it
Mbrëmja u mbyll me Pin-Up Stars, markën italiane të themeluar në Bolonjë në vitin 1995, nën drejtimin kreativ të Jerry Tommolinit. Koleksioni Spring/Summer 2027, Sotto il segno dei fiori, solli një interpretim të beachwear-it që shkon përtej veshjeve tradicionale të plazhit. Lulet dhe fluturat u shfaqën përmes aplikimeve tredimensionale, ndërsa referencat nga bota detare dhe estetika nautike krijuan një tjetër drejtim vizual. Detajet dekorative, materialet dhe mënyra e ndërtimit të veshjeve propozonin një garderobë që mund të përdoret edhe jashtë plazhit, gjatë ditës apo në mbrëmje. Me një histori mbi tridhjetëvjeçare, Pin-Up Stars ka zhvilluar një identitet të dallueshëm në modën italiane, duke e trajtuar beachwear-in si një kategori ku ka hapësirë për eksperimentim dhe krijimtari.
Pas pasarelës, njerëzit që realizojnë një sfilatë
Një koleksion mund të prezantohet në pak minuta, por përgatitja e një sfilate kërkon një punë të gjatë dhe bashkëpunimin e shumë profesionistëve. Përzgjedhja e modeleve, përgatitja e flokëve dhe grimit, koordinimi i daljeve, fotografia dhe drejtimi i përgjithshëm i aktivitetit janë pjesë të një procesi ku çdo detaj ka rëndësi. Në GX Fashion Week, drejtimi i ekipit të bukurisë iu besua Diana Jaupit, Hair Director, dhe Alex Randulescu, Make-up Director. Së bashku me ekipin e tyre ndërkombëtar dhe Emma Berishën, Image Advisor, ata punuan për të përshtatur pamjen e modeleve me identitetin e secilit koleksion. Koordinimi i përgjithshëm i aktivitetit u drejtua nga Alessia Xhafa, përgjegjëse për organizimin dhe mbarëvajtjen e proceseve pas pasarelës. Prezantimi i mbrëmjes iu besua Alessio Marrarit, komunikues dhe përgjegjës për komunikimin ndërkombëtar të GX dhe Albania Fashion Week. Ndërsa koordinimi i fotografisë u realizua nga Arjentina Kola dhe Nicola Giordano, të cilët drejtuan dokumentimin vizual të aktivitetit.
Puna e këtyre profesionistëve është një pjesë e rëndësishme e çdo sfilate, edhe pse vëmendja e publikut përqendrohet kryesisht te stilistët dhe modelet.
Milano, pesë koleksione dhe një pasarelë ndërkombëtare
GX Fashion Week mblodhi në një pasarelë krijues me përvoja dhe identitete të ndryshme. Nga mjeshtëria sartoriale e Michele Umberto Perrera-s, e zhvilluar gjatë më shumë se gjashtë dekadave, te kërkimi i Xheksil Muçës mbi folklorin shqiptar, koleksionet sollën mënyra të ndryshme të të menduarit dhe të krijuarit në modë.
Për THELB, ndjekja nga afër e këtij aktiviteti ishte një mundësi për të njohur punën e stilistëve, për të parë koleksionet dhe për të dokumentuar edhe atë pjesë të organizimit që zakonisht mbetet jashtë vëmendjes së publikut.
Në një qytet ku gjatë Javës së Modës zhvillohen dhjetëra prezantime dhe aktivitete, GX Fashion Week krijoi hapësirën e vet për pesë koleksione, duke bashkuar emra me përvojë dhe stilistë të një brezi të ri.
Palazzo Giureconsulti, që vetëm pak ditë më parë kishte mirëpritur Vogue Café, u bë kësaj here skena e një tjetër aktiviteti mode. Një shembull i mënyrës se si hapësirat historike të Milanos marrin jetë të re gjatë Javës së Modës, duke mirëpritur krijues, profesionistë dhe publik nga vende të ndryshme.
THELB | Milano, 28 shtator 2026
Fotografi: Courtesy of GX Fashion Week
