Sonte, në zemër të Milanos, nën kupolën prej qelqi dhe hekuri të Galleria Vittorio Emanuele II, moda italiane do të kthehet pas në kohë për të parë nga e ardhmja. Është një nga ato hapësira ku Milano duket se ka mbledhur në një vend disa prej gjërave që e kanë bërë qytetin atë që është: arkitekturën, artin, tregtinë dhe modën. E pikërisht këtu, në ditën e parë të Milan Fashion Week, Vogue World do të zhvillojë edicionin e tij të pestë.
Këtë herë, historia nis me atë që Italia di ta bëjë prej shekujsh: punën me dorë. Por nuk ndalet aty. Nga mjeshtëria e artizanëve te industrializimi, nga tekstilet dhe rrobaqepësia te teknologjia dhe mënyrat e reja të krijimit, Vogue World: Milano do të ndjekë ndryshimet që kanë kaluar moda italiane nga një brez te tjetri. Kjo është edhe arsyeja pse Milano është qyteti i duhur për këtë histori. Në një industri ku teknologjia po hyn gjithnjë e më thellë në procesin e krijimit, Vogue World zgjedh të flasë për atë që ndodh përpara se një veshje të bëhet imazh për duart që e presin, e qepin, e ndërtojnë dhe i japin formë. Tema e këtij edicioni është pikërisht marrëdhënia mes mjeshtërisë njerëzore dhe teknologjisë.
Një pasarelë në zemër të Milanos
Galleria Vittorio Emanuele II nuk është një sfond i zgjedhur rastësisht. E përfunduar në vitin 1877, ajo lidh Piazza del Duomo me Piazza della Scala dhe prej më shumë se një shekulli është një nga vendet ku jeta e Milanos kryqëzohet me modën, tregtinë dhe kulturën. Sonte, kalimi i saj i famshëm do të kthehet në pasarelë.
Zgjedhja e Galleria-s e bën edhe më të qartë idenë e këtij Vogue World. Është një hapësirë e ndërtuar në një epokë kur arkitektura dhe teknologjia po ndryshonin mënyrën se si dukej qyteti, por që sot vazhdon të jetë pjesë e jetës së përditshme të Milanos. Në të njëjtin vend ku kalojnë turistë, milanezë dhe klientë të dyqaneve historike e të shtëpive të modës, sonte do të prezantohet një histori për mënyrën se si Italia ka ndërtuar dhe vazhdon të ndërtojë modën e saj.
Nga puna me dorë te epoka e teknologjisë
Vogue World nuk është konceptuar si një sfilatë tradicionale. Shfaqja është ndarë në pesë akte, të cilat ndjekin ndryshimet e modës italiane nga mjeshtëria artizanale te industrializimi, Made in Italy, teknologjia dhe mënyrat e reja të imagjinimit të së ardhmes.
Pjesa e parë kthehet te Rilindja dhe te materialet e punuara me kujdes: brokadë, dantellë, qëndisje dhe tekstura që kërkojnë ende kohën dhe dorën e mjeshtrit. Më pas historia kalon te industrializimi dhe te rrobaqepësia moderne, përpara se të mbërrijë te një prej shprehjeve më të njohura të modës italiane: Made in Italy. Në pjesët e fundit, vëmendja zhvendoset te teknologjia dhe te mënyrat se si ajo mund të hyjë në procesin krijues pa e hequr njeriun prej tij.
Kështu, shfaqja nuk e vendos traditën dhe teknologjinë përballë njëra-tjetrës. I vendos në të njëjtën histori. Dhe kjo është ndoshta pjesa më interesante e Vogue World: Milano jo ideja se moda duhet të zgjedhë mes asaj që ka qenë dhe asaj që do të vijë, por se si ajo që është mësuar ndër breza mund të përdoret për të krijuar diçka të re.
Roberto Bolle dhe një tjetër mënyrë për të bashkuar traditën me teknologjinë
Një nga momentet kryesore të mbrëmjes do të jetë performanca e Roberto Bolle. Baletari italian, étoile i Teatro alla Scala, do të sjellë në Galleria një koreografi të krijuar nga Laccio, ku baleti klasik do të takohet me teknologjinë.
Bolle ka eksperimentuar prej vitesh me projeksionet, ekranet LED dhe imazhet dixhitale në shfaqjet e tij. Për Vogue World, kjo ide bëhet pjesë e vetë historisë së eventit: një formë arti me një traditë të gjatë që nuk largohet nga origjina e saj, por përdor teknologjinë për të gjetur një mënyrë tjetër për t’u shfaqur.
I njëjti dialog shfaqet edhe në materialet që kanë paraprirë eventin. Në serinë e videove të realizuara nga Bardia Zeinali, Vittoria Ceretti shfaqet në një histori që ndjek kalimin e veshjes nga puna e dorës te makineritë dhe teknologjitë e reja. Ideja nuk është të paraqitet kjo si një humbje e asaj që ka qenë më parë, por si një proces që vazhdon të ndryshojë bashkë me mënyrën se si krijojmë.
Kjo e bën edhe më të qartë se çfarë kërkon të tregojë Vogue World këtë herë. Milano nuk prezantohet vetëm si një qytet me një histori të madhe mode, por si një vend ku zanati, industria dhe teknologjia kanë qenë gjithmonë pjesë e të njëjtit zhvillim.
Biblioteka e Quarto Oggiaro në qendër të Vogue World
Ka edhe një arsye tjetër pse Vogue World: Milano nuk është vetëm një spektakël mode. Të ardhurat nga biletat e eventit do të përdoren për rikualifikimin e Bibliotekës Publike të Quarto Oggiaro, një zonë në veriperëndim të Milanos. Vogue ka konfirmuar një investim prej të paktën 2 milionë eurosh për ta kthyer bibliotekën në një qendër kulturore të re, me hapësira për të mësuar, krijuar dhe punuar së bashku.
Zgjedhja ka një lidhje të drejtpërdrejtë me temën e këtij edicioni. Biblioteka nuk do të mbetet vetëm një vend ku merren libra, por do të zhvillohet si një hapësirë ku kultura, teknologjia dhe krijimtaria mund të takohen. Projekti synon veçanërisht të krijojë mundësi për të rinjtë e zonës, duke e bërë bibliotekën një pikë takimi dhe zhvillimi për komunitetin.
Në këtë mënyrë, Vogue World ndërton një lloj rruge mes dy Milanos: nga Galleria Vittorio Emanuele II, një prej simboleve të qytetit dhe një prej hapësirave më të lidhura me luksin dhe modën, te një bibliotekë në një lagje periferike. Është një nga ato detaje që e bën eventin më interesant përtej pasarelës: moda nuk përdoret vetëm për t’u parë, por edhe për të financuar një hapësirë që synon t’u japë njerëzve mundësi të krijojnë vetë.
Një muaj që i përket modës
Që nga edicioni i parë në New York në vitin 2022, Vogue World ka zgjedhur të ndërtojë një histori të ndryshme në çdo qytet ku është zhvilluar. Në Londër, moda u lidh me artet skenike; në Paris, me sportin; ndërsa në Los Angeles, me kinemanë. Milano sjell në qendër mjeshtërinë italiane dhe mënyrën se si ajo ka ndryshuar nga puna e dorës te teknologjitë e reja.
Pas New York-ut dhe Londrës, radha i vjen Milanos, ndërsa më pas muaji i modës do të vazhdojë në Paris. Në këtë kalendar që çdo vit zhvendos vëmendjen e industrisë nga një qytet në tjetrin, Milano hyn këtë herë me një event që nuk është thjesht hapja spektakolare e Fashion Week, por një mënyrë për të treguar historinë e vet përmes modës, artit, muzikës, baletit dhe teknologjisë.
Në Galleria Vittorio Emanuele II, moda do të tregojë historinë e saj përmes veshjeve, performancës dhe zanatit, ndërsa jashtë saj një pjesë e këtij eventi do të vazhdojë në një bibliotekë të një lagjeje të Milanos.
Vogue World: Milano zhvillohet sonte, 22 shtator, në orën 20:00 sipas orës lokale dhe do të transmetohet drejtpërdrejt online.
-THELB,
