Wimbledon 2026 ka hapur siparin jo vetëm me ndeshje spektakolare, por edhe me paraqitje që konfirmojnë se turneu më prestigjioz i tenisit mbetet një nga skenat më elegante të sportit. I njohur për traditën, kodin e rreptë të veshjes dhe atmosferën unike, Wimbledon ka qenë gjithmonë një vend ku moda dhe sporti ecin krah për krah.
Në fushat e gjelbra të All England Club, vëmendja nuk u përqendrua vetëm te loja. Nga krijime të frymëzuara nga estetika japoneze deri te xhaketa të zhvilluara me teknologjinë më të fundit, tenistët dëshmuan se stili mund të jetë po aq i spikatur sa edhe performanca në fushë.
Jannik Sinner, teknologji në shërbim të stilit
Kampioni në fuqi, Jannik Sinner, u rikthye në Wimbledon për të mbrojtur titullin e fituar vitin e kaluar. Debutimi i tij nuk ishte pa emocione, mes rrëshqitjeve, gabimeve dhe madje edhe një momenti kur çorapet e bardha u njollosën me gjak, duke thyer për pak çaste kodin e famshëm “total white” të turneut.
Por përtej ndeshjes, vëmendjen e mori edhe pamja e tij. Sinner u shfaq me një xhaketë Nike të frymëzuar nga linja teknike ACG, e krijuar për të ofruar ventilim dhe rehati maksimale. Një zgjedhje që tregoi se moda sportive sot nuk është vetëm çështje estetike, por edhe inovacioni.
Naomi Osaka sjell modën japoneze në Wimbledon
Nëse Sinner zgjodhi teknologjinë dhe minimalizmin, Naomi Osaka bëri krejt të kundërtën: ajo vendosi ta shndërrojë debutimin e saj në një deklaratë mode.
Katër herë fituesja e turneve Grand Slam, e njohur prej vitesh për pasionin e saj ndaj modës, bashkëpunoi me stilisten Hana Yagi për një veshje të krijuar posaçërisht për debutimin në Wimbledon. Frymëzuar nga veshjet ceremoniale japoneze dhe me referenca vizuale nga filmi Kill Bill, veshja me shtresa, pala dhe qëndisje të detajuara u bë menjëherë një nga momentet më të komentuara të ditës së parë të Wimbledon 2026.
Një tjetër dëshmi se Osaka vazhdon ta shohë modën si pjesë të identitetit të saj në fushën e tenisit.
Coco Gauff rikthen elegancën e viteve ’90
Edhe Coco Gauff nuk mungoi me një zgjedhje që tërhoqi vëmendjen. Tenistja amerikane veshi një minifustan të bardhë, pjesë e bashkëpunimit mes New Balance dhe Miu Miu. Me siluetën e frymëzuar nga vitet ’90 dhe detajet minimaliste, veshja ruante kodin tradicional të Wimbledon-it, por i jepte atij një interpretim modern dhe bashkohorë.
Novak Djokovic, besnik i elegancës klasike
Shtatë herë kampioni i Wimbledon, Novak Djokovic, mbeti besnik stilit të tij elegant. Ai zbriti në fushë me një xhaketë ekskluzive Lacoste, të realizuar me teknologji moderne dhe punime artizanale.
Qepjet e ngjitura, prerjet me lazer dhe stema e qëndisur me dorë, e frymëzuar nga tekstura e barit të Wimbledon-it, ishin detaje që i bënin homazh traditës dhe elegancës së turneut më të elegant të tenisit në botë.
Ndërsa tribunat mbushen me emra të njohur si Bad Bunny dhe David Beckham, tenistët po dëshmojnë se kodi tradicional i veshjes ‘total white’ mund të jetë njëkohësisht klasik, modern dhe plot stil. Wimbledon 2026 konfirmon edhe një herë se nuk është vetëm një turne tenisi, por edhe një pasarelë ku sporti dhe moda ecin krah për krah.
– THELB,
