Gjatë eventit kushtuar filmit The Odyssey në Londër, Charlize Theron u shfaq me një krijim të Givenchy, duke konfirmuar edhe një herë marrëdhënien gjithnjë e më të fortë me vizionin e drejtores artistike Sarah Burton.
Aktorja, e cila në filmin e ri të Christopher Nolan interpreton nimfën Kalipso, zgjodhi fillimisht një look total black të Givenchy, të shoqëruar me doreza të bardha me përmasa të theksuara. Më vonë, në after party, ajo u shfaq me një version në të kuqe të të njëjtit koncept, të kombinuar me doreza të zeza. Në të dyja rastet, protagonisti ishte i njëjti, një fustan kadifeje me drapime dhe volume të studiuara, ku eleganca ndërtohej më shumë përmes formës sesa dekorit.
Në koleksionet e para të Sarah Burton për Givenchy, vëmendja është përqendruar te ndërtimi i siluetës. Veshjet nuk mbështeten te zbukurimet apo dekorimet e tepërta, por te prerja, proporcioni dhe mënyra si materiali modelon trupin. Pikërisht këto elemente dallohen edhe në zgjedhjen e Charlize Theron.
Charlize Theron duket se është një nga interpretueset më bindëse të këtij vizioni. Stili i saj ka qenë gjithmonë i karakterizuar nga linja jo shumë të komplikuara dhe zgjedhje të menduara, ndaj estetika e Burton përshtatet natyrshëm me imazhin e saj publik.
Në një moment kur Givenchy po hyn në një kapitull të ri krijues, paraqitje të tilla nuk shërbejnë vetëm për të promovuar një fustan. Ato tregojnë edhe mënyrën se si një shtëpi mode fillon të ndërtojë identitetin e saj përmes grave që e veshin.
– THELB,
