Pas një karriere të ndërtuar mes roleve që kanë lënë gjurmë në kinemanë botërore dhe një historie dashurie që nisi më shumë se tre dekada më parë, Penélope Cruz dhe Javier Bardem do të ndajnë sërish ekranin e madh.
Dy fituesit e çmimit Oscar do të jenë protagonistët e ‘Bunker’, thrillerit të ri psikologjik të regjisorit Florian Zeller, i cili do të prezantohet në konkurrim në edicionin e 83-të të Festivalit Ndërkombëtar të Filmit në Venecia.
Në film, Cruz dhe Bardem interpretojnë një çift që përballet me një krizë të thellë morale dhe emocionale. Historia ndjek një arkitekt që pranon të projektojë një bunker mbijetese për një miliarder të teknologjisë, një vendim që fillon të ndikojë jo vetëm në jetën e tij profesionale, por edhe në martesën e tij pas 17 vitesh.
Me këtë projekt, Florian Zeller, regjisori i ‘The Father’ dhe ‘The Son’, rikthehet te temat që e kanë karakterizuar krijimtarinë e tij: marrëdhëniet njerëzore, dilemat morale dhe pasojat që zgjedhjet personale mund të kenë mbi jetën private.
Për Penélope Cruz dhe Javier Bardem, ‘Bunker’ shënon një tjetër bashkëpunim pas filmave ‘Jamón, Jamón’, ‘Vicky Cristina Barcelona’, ‘Loving Pablo’ dhe ‘Everybody Knows’. Historia e tyre artistike nisi në vitin 1992 pikërisht në xhirimet e ‘Jamón, Jamón’, filmi që shënoi debutimin kinematografik të Cruz. Miqësia e asaj kohe u shndërrua vite më vonë në një histori dashurie, duke i bërë sot një nga çiftet më të njohura të kinemasë ndërkombëtare.
Përveç dy protagonistëve, filmi sjell në ekran edhe Stephen Graham, Paul Dano dhe Patrick Schwarzenegger.
Me një kast të tillë dhe me Florian Zeller pas kamerës, ‘Bunker’ pritet të jetë një nga premierat më tëkomentuara të Festivalit të Venecias, jo vetëm për emrat që bashkon, por edhe për historinë që vendos në qendër: mënyrën se si zgjedhjet profesionale mund të ndryshojnë rrënjësisht ekuilibrin e një marrëdhënieje.
– THELB,
